ياترى فاهمين صح الحاجات اللى بتمر علينا فى الدنيا وبناخد منها الحكمة والمتعة المباحة منها ولا بتسحرنا عطايا رب العالمين وبناخد منها حظ نفسنا وبس !!

عايزين نَملِك ولا نُملَك عايزين الدنيا دي تكون فى ايدينا مش فى قلوبنا عشان تبقى باب الى الله مش حجاب وحاجز عنو

سحر النهار دة

سحـــــــــــــر الوسطية

قال صلى الله عليه وسلم (يخرج من ضئضى  هذا اقوام  يحقرون صلاتكم الى صلاتهم وصيامكم الى صيامهم يخرجون من الدين كما يخرج السهم من الرمية)

فى ناس ممكن تكون بتعبد ربنا كتير لكنها برة الدين ..ناس كانت فاكرة نفسها متدينة فكفًرت الناس ..وهرب الناس من فكرة المتشددين ..الى فكرة الوسطية

وكلمة الوسطية معناها جميل جدا تفيد  العيشة بالدين فى ظل تطورات الحياة ..هي تطبيق الشريعة فى كل عصور الحياة ..الوسطية قادرة على استيعاب كل انواع البشر

عشان كدة بقى للوسطية سحر ..بقى فى خلط للهوى والمزاج مع الوسطية.. للخروج بدين جديد فيه تسيب اكتر ويوصف غيرو اللى هو وسطية بانو تشدد ..

تعالو نسأل نفسننا هل احنا وسطيين فعلا ولا احنا متسيبين بس بنسمى التسيب دة وسطية؟؟!!!

اول علامة من علامات سحر الوسطية هو التناقض بما يوافق الهوى..

شخص بيكون بحب ربنا بجد بس لو سحرتو الوسطية يغلبو هواه  ..تلاقيه بياخد من الدين حتة ويخلى حتة حسب الحاجة اللى بتريحو وتجى مع هواه ونفسو .. ويوصف اللى بيعمل الحاجات دى كلها انو متشدد

قال صلى الله عليه وسلم (ان الله حد حدودا فلا تعتدوها وفرض فرائضا فلا تضيعوها وحرم اشياء فلا تنتهكوها)

انت كدة حتقول لى انت عايزنا كدة نعمل كل حاجة وكدة صعب ..ايوة حاول تعمل كل حاجة (اتقوا الله ما استطعتم) واللى مش قادر تعملو ادعى ربنا يساعدك تعملو لكن ما تقولش انا مش لازم اعملو لان دة تشدد.. لأ انت لازم تحاول ولما تحاول وما تقدرش ربنا برحمتو امكن يتجاوز عنك ..

العلامة التانية

التعويل على النية لا على العمل..

 دلوقتى لو عملت بحث ميدانى تلاقى اللى متمسكين بفكرة الدين الوسطى ناس اخلاقها حلوة  بتحب اعمال الخير والعمل الطوعى وحاجات كتير من النوع دة بتثبت شعور جواهم ان" انا كويس"

انا كويس فمش لاززم اعمل كل حاجة!!

 فتلاقيه مثلا فى العمل الخيري دة فى اختلاط وهظار رهيب فتسالو يقولك المهم نيتى !! لأ استنى المعصية مافيهاش نية !! (انما الاعمال بالنيات) دى النية فى العمل الصالح فكل حد بياخد اجرو فى عملو حسب نيتو ..لكن مش انا اعمل معصية قاصد واقول المهم النية .. وكمان تلاقيه اذا لقى واحد بيغضو بصرو او وحدة ما بتسلمش يقول ايه التشدد دة!! لا دة مش تشدد دة كلام ربنا وكلام سيدنا محمد

يقولك المهم نيتى وانا بسلم ولا وانا ببص ..لآ يا جماعة فى حلال وحرام ..وما ينفعش لما حد يبعد عن حاجة هى فعلا حرام اقول عليه انسان متشدد !!

القلب فعلا هو البداية بس لازم يظهر كمان على الشكل والتصرفات لو استمرينا نقول مثلا الحجاب دة تشدد وغض البصر والتعامل بحدود من غير هظار بين الولاد والبنات دة تشدد ..يبقى احنا كدة لغينا نص الدين وسندنا على النية ..ودي علامة المسحور بالوسطية انو يعوِّل على النية وينسى العمل فخدو بالكم يا شباب !!

العلامة التالتة هي قلة التوبة Lوقلة محاسبة النفس

 ..فى مدخل محبب اوى للشيطان انو يصغر المعصية فى عيونا ويكبر فى عيونا رحمة ربنا وهي فعلا معاصينا صغيرة قدام رحمة ربنا بس ما ينفعش نعيش كدة!!

تلاقيه عايش بلايف استايل شايفو تمام اوى بس تلاقى اختلاط وهظار وخروجات او اللبس مش مظبط اوى او كدب كتيرو يقولك دى كدبة بيضا.. فلما الوسطية بتسحرنا الضوابط دى بتتمط مننا اوى.. فالواحد ما بيحسش انو هو بيغلط وبالتالى ما بيتوبش كتير!! وكلنا عارفين سيدنا محمد عليه الصلاة والسلام كان بتووب كتير اوى فى اليوم واحنا مفروض نتوب اكتر من كدة ..

دلوقتى اسال نفسك اخرر مرة تبت امتى ؟

الانسان بيتوب لما يحس بالندم.. لو ما بتتوبش كتير اوع تكون حياتك ضوابطها واااااااااااااسعة اوى فالوسع الزايد دة ممكن يكون جواه معاصي كتير.كتير اوى.

فى حدود يا جماعة لما بنخترقها بنوقع.. ولو هى دى الوسطية اللى عايشين بيها يبقى احنا نسينا حاجات كتيرة اوى فى الدين ولو حنقعد نغير دينا فى السهرات عشان ستايل السهرات وفى القعدات العائلية وفى وفى وفى يبقى دينا حيتغير اوى !!!

طيب ايه هي عواقب السحر دة

اول عاقبة هي التوقف عن الترقى فى مقامات القرب الى الله عز وجل ..طريقنا مع ربنا عامل زي السلالم يا جماعة.. النهار دة تبت بكرة بديت احب ربنا اكتر اتقرب اليه اذكرو ادعو اليه احس بربنا اكتر بشوفو فى كل حاجة فى حياتى اشكر نعمتو ..مقامات العلماء الفوا فيها ياما كتب !!

الشخص المسحور اخطاءو كتيرة ومش بيتوب عنها وبيقول المهم نيتى وفى طاعات كتير مش قادر يعملها والقلب الطاعة تقويه وترك المعصية ينقيه.. فكترة المعاصى حتخلى القلب يقفل وقلة الطاعات ما بتخليش القلب ينضج مع ربنا ما بيخشعش وما بيحسش بلذة الطاعة او بحب ربنا ودة كلو من تحت فكرة انى انا وسطى

قال صلى الله عليه وسلم(ولا يزال العبد يكذب وتنكت فى قلبه نكتة سوداء حتى يسود قلبه كله فيكتب عند الله من الكاذبين) كدبة ورا كدبة ويقولك كدبة بيضا وبلاش تزمت ..فيكتب عند الله من الكاذبين !!!!

العاقبة التانية ودى مرعببببة !

مرعبة ليه لانو الشخص دة بيبقى مروج لنمط غير سوي من التدين..اسمو الوسطية بس دة مش وسطية..الشكل المتناقض اللى بتلاقيه بيصلى واخلاقو عالية وبحب عمل الخير بس بحب يخرج ويهظر وممكن يتنازل عن حاجات هى فى الاصل حراام .. الشكل دة لذيذ !! لانو بيطمن القلب ..يقولك معلش ياعم دة ربنا غفور رحيم!! عندك حق ربنا رحيم اوى بينا وحيغفر لينا بس مايبقاش دة منهج حياتك وتوصف غيرك بالتشدد ..

انت فى يوم من الايام حتتسال عن اللى كنت بتروج ليه دة!!

عن المنهج اللى بريح القلب دة وحببت الناس فيه وهو مش صح ..

الوسطية هي وسط بين الافراط(التشدد) والتفريط (التسيب) هو التماشي مع العصور بس بما لايخالف الشريعة الاسلامية

طيب يا جماعة ايه الحل

خد الموضوع بجدية (خذوا ما ءاتيناكم بقوة) لو حاجة مش فى استطاعتنا ربنا ماكنش امرنا بيها ولو ضعفت وماقدرتش تعملها قول يا رب وهو حياخد بايدك

ابن القيم بيقول:  يا ضعيف العزم اين انت والطريق هذا طريق شاخ فيه نوح والقي فى النار ابراهيم ونشر زكريا بالمناشير وذبح السيد الحصور يحي ولاقى محمد صلى الله عليه وسلم اشد انواع الاذى وانت تلهو وتلعب !

لازم الدين يتاخد بقوة ..الدين مش اختيارى يا جماعة ..واللى بياخد الدين بقوة ويحاول يطبقو فى جميع تفاصيل حياتو دة مش متشدد دة انسان عبد لربه ..اللى ماتقدرش عليه ما توصفش اللى بيعملو بالتشدد وادعى ربنا يعينك عليه وماتحكمش على حد بالتشدد الا من رايته يزيد على الشريعة ويبدا يكّفر ويفسّق!!

تعالو ننكون فى مقام سيدنا محمد.. الوسطية اللى بجد ..اللى كان يرسل الصحابة ليدعو الناس ويقوول بشرو ولا تنفرو يسرو ولا تعسرو ..وكان يقول لما حد يطوّل فى فى الصلاة :(ايها الناس ان منكم منفرون فايكم أم الناس فليوجز فإن خلفه الضعيف  والسقيم وذا الحاجة)

هو دة اللى احنا عايزينو لكن التسيب هو دة السحر الحقيقى اللى احنا جايين ننفيه عن دينا الوسطى ..استعين بالله وقول يارب (اهدنا الصراط المستقيم صراط الذين انعمت عليهم غير المغضوب عليهم ولا الضالين) وربنا يتقبل مننا كلنا ^_^